છેલ્લા બે વર્ષથી સેનામાં કેમ નથી થઇ રહી જવાનોની ભરતી? સંસદમાં કેન્દ્ર સરકારે જણાવ્યું કારણ

સરકારે આજે સોમવારે સંસદમાં કહ્યું કે કોવિડ મહામારીને કારણે 2020 અને 2021માં ભારતીય સેનામાં ભરતી પ્રક્રિયા સ્થગિત કરવામાં આવી છે અને તેના પર કોઈ પ્રતિબંધ લગાવવામાં આવ્યો નથી. રાજ્યસભામાં પ્રશ્નકાળ દરમિયાન પૂરક પ્રશ્નોના જવાબમાં સંરક્ષણ રાજ્ય મંત્રી અજય ભટ્ટે આ માહિતી આપી હતી. તેમણે કહ્યું કે કોવિડ મહામારીનો પ્રકોપ ઓછો થયો છે, પરંતુ તે હજી સમાપ્ત થયો નથી.

કોરોનાવાયરસ મહામારીને કારણે છેલ્લા બે વર્ષમાં આર્મીમાં ભરતી રેલીઓનું આયોજન કરવામાં આવ્યું નથી. તેમણે કહ્યું કે આવી ભરતી રેલીઓ મોટી સંખ્યામાં ઉમેદવારોને આકર્ષે છે, તેથી કોરોના વાયરસના સંક્રમણને ફેલાતો અટકાવવા માટે આવી ભરતી રેલીઓ મોકૂફ રાખવામાં આવી હતી. તેમણે કહ્યું કે આ દરમિયાન એરફોર્સ અને નેવીમાં ઓનલાઈન ભરતી પ્રક્રિયા ચાલુ રહી અને કર્મચારીઓની ભરતી કરવામાં આવી છે.

સંરક્ષણ દળોમાં ભરતી અંગે, સંરક્ષણ પ્રધાન રાજનાથ સિંહે એક પ્રશ્નના લેખિત જવાબમાં કહ્યું કે કોવિડ મહામારીને કારણે, સેનામાં ભરતી પ્રક્રિયા સ્થગિત કરવામાં આવી છે. તેમણે કહ્યું કે ભારતીય સેનામાં 2018-19 અને 2019-20માં અનુક્રમે 53,431 અને 80,572 ભરતી કરવામાં આવી હતી.

રાજનાથ સિંહે કહ્યું કે 2020-21 અને 2021-22માં ભારતીય નૌકાદળમાં અનુક્રમે 2,772 અને 5,547 જવાનોની ભરતી કરવામાં આવી હતી. તેવી જ રીતે, 2020-21 અને 2021-22માં અનુક્રમે 8,423 અને 4,609 કર્મચારીઓની એરફોર્સમાં ભરતી કરવામાં આવી હતી.