Ukraine Russia War: પીએમ નરેન્દ્ર મોદીએ યુક્રેનમાં માર્યા ગયેલ નવીનના પરિજનો સાથે કરી વાત, કહ્યું- દેશ છે તમારી સાથે

Naveen Killed in Ukraine: યુક્રેનના ખાર્કિવમાં ગોળીબારમાં માર્યા ગયેલા કર્ણાટકના મેડિકલ સ્ટુડન્ટ નવીન શેખરપ્પાના પરિવારજનો સાથે પીએમ નરેન્દ્ર મોદીએ વાત કરી છે. પરિવારના સભ્યો સાથે વાતચીતમાં સંવેદના વ્યક્ત કરતા પીએમ મોદીએ કહ્યું કે આ દુ:ખની ઘડીમાં આખો દેશ તેમની સાથે છે. પીએમ નરેન્દ્ર મોદી પહેલા રાજ્યના સીએમ બસવરાજ બોમાઈએ પણ નવીનના પરિવારના સભ્યો સાથે વાત કરી હતી અને આ ઘટના પર શોક વ્યક્ત કર્યો હતો. આ સાથે તેમણે પરિવારને આશ્વાસન પણ આપ્યું હતું કે તેઓ વિદેશ મંત્રાલયના સંપર્કમાં છે જેથી નવીનનો મૃતદેહ ભારત લાવવામાં આવે અને પરિવાર અંતિમ સંસ્કાર આપી શકે.

યુક્રેનમાં મેડિસિનનો અભ્યાસ કરતો નવીન શેખરપ્પા કર્ણાટકના ચલગેરીનો રહેવાસી હોવાનું સામે આવ્યું છે. નવીનનાં મૃત્યુની પુષ્ટિ વિદેશ મંત્રાલયે આજે બપોરે એક ટ્વીટમાં કરી હતી. મંત્રાલયે જણાવ્યું કે આજે સવારે ખાર્કિવમાં ગોળીબાર દરમિયાન ગોળી વાગવાથી નવીનનું મોત થયું હતું. એવું કહેવામાં આવી રહ્યું છે કે તે કરિયાણાની દુકાનમાં સામાન લેવા ગયો હતો, તે દરમિયાન તેને ગોળી વાગી અને તેનું મોત થયું હતું. નવીનના પિતાએ જણાવ્યું કે તેઓ દરરોજ પુત્રના સંપર્કમાં હતા. દરરોજ તેણે તેની સાથે લગભગ ત્રણ વખત વાત કરી, પરંતુ તેમને વિચાર્યું ન હતું કે તેમનો પુત્ર પાછો નહીં આવે.

વિદેશ મંત્રાલયે કહ્યું કે અમે આ દુ:ખદ ઘટના અંગે પરિવાર પ્રત્યે સંવેદના વ્યક્ત કરીએ છીએ. એટલું જ નહીં તેમણે કહ્યું કે વિદેશ સચિવે રશિયા અને યુક્રેનના રાજદૂતોને સમન્સ જારી કર્યા છે. બંને દેશો તરફથી ભારતીય વિદ્યાર્થીઓને સુરક્ષિત બહાર કાઢવાની વ્યવસ્થા કરવાની માંગણી કરવામાં આવી છે. કેટલાક ભારતીય વિદ્યાર્થીઓ હજુ પણ ખાર્કિવ અને અન્ય શહેરોમાં ફસાયેલા છે અને સરકાર દ્વારા તેમને બચાવવાના પ્રયાસો તેજ કરવામાં આવ્યા છે. પીએમ નરેન્દ્ર મોદી વતી એરફોર્સને પણ ઓપરેશન ગંગામાં સામેલ થવાનો આદેશ આપવામાં આવ્યો છે. ભારતીય વાયુસેનાનું C-17 ગ્લોબમાસ્ટર એરક્રાફ્ટ યુક્રેનમાં ફસાયેલા ભારતીયોને બહાર કાઢવાના કામમાં રોકાયેલું રહેશે.