![](https://mediaassets-in.blr1.cdn.digitaloceanspaces.com/gujaratcoverage/2021/08/New-Project-51.jpg)
દિલ્હીના છત્રસાલ સ્ટેડિયમમાં 23 વર્ષીય જુનિયર રેસલર સાગર રાણાની હત્યાના સંદર્ભમાં દિલ્હી પોલીસની ક્રાઈમ બ્રાન્ચ સોમવારે તેની પ્રથમ ચાર્જશીટ દાખલ કરે તેવી શક્યતા છે. ક્રાઈમ બ્રાંચના સૂત્રોના જણાવ્યા અનુસાર, પોલીસ ચાર્જશીટમાં ઓલિમ્પિક મેડલ વિજેતા આંતરરાષ્ટ્રીય કુસ્તીબાજ સુશીલ કુમાર સહિત 12 આરોપીઓ અને 50 થી વધુ સાક્ષીઓના નામનો ઉલ્લેખ છે. સુશીલ કુમાર ને હત્યા, ગુનાહિત હત્યા અને અપહરણ જેવા આરોપોનો સામનો કરવો પડી રહ્યો છે. સુશીલ હાલમાં તિહાર જેલમાં બંધ છે.
મળતી માહિતી મુજબ, દિલ્હીના છત્રસાલ સ્ટેડિયમમાં ચાર મે ની રાત્રે કુસ્તીબાજ સુશીલ અને તેના સહયોગીઓએ કથિત રીતે સાગર રાણા અને તેના મિત્રો સોનુ મહેલ અને અમિત કુમારનું દિલ્હીના મોડેલ ટાઉન પોલીસ સ્ટેશન વિસ્તારના એક ફ્લેટમાંથી અપહરણ કર્યું હતું અને પછી તેને નિર્દયતાથી તેને છત્રસાલ સ્ટેડિયમમાં લઈ જઈને માર માર્યો હતો. જેમાં સાગર ગંભીર રીતે ઘાયલ થયો હતો અને સારવાર દરમિયાન સાગરનું મોત નીપજ્યું હતું.
આ કેસમાં અત્યાર સુધીમાં કુલ 12 આરોપીઓની ધરપકડ કરવામાં આવી છે. પોલીસે ઘટનાના દિવસે એક આરોપી પ્રિન્સને ઘટનાસ્થળેથી પકડી પાડ્યો હતો, જ્યારે આ પછી સ્પેશિયલ સેલ દ્વારા સુશીલ કુમાર અને અજયની ધરપકડ કરવામાં આવી હતી. તે જ સમયે, આસોડા-બવાના ગેંગના અન્ય ચાર બદમાશો ભૂપેન્દ્ર ઉર્ફે ભૂપી, મોહિત ઉર્ફે ભોલી, ગુલાબ ઉર્ફે પેહલવાન અને મનજીત ઉર્ફે ચુનીલાલની ધરપકડ કરવામાં આવી હતી.
ત્યારબાદ વિરેન્દ્ર ઉર્ફે વિન્ડર અને રોહિત કરોરને પોલીસે પકડી પાડ્યા હતા. 11 જૂને સોનીપતના અનિરુદ્ધ નાહરી નામના કુસ્તીબાજની ધરપકડ કરવામાં આવી હતી. આ કેસમાં 11 મા આરોપી જુડો કોચ સુભાષની 15 જૂને ધરપકડ કરવામાં આવી હતી, જ્યારે જુનિયર કુસ્તીબાજ ગૌરવની 26 જૂને ધરપકડ કરવામાં આવી હતી.
પોલીસ સુશીલ કુમારને આ કથિત હત્યાનો મુખ્ય ગુનેગાર અને માસ્ટરમાઇન્ડ ગણાવી રહી છે. પોલીસનું કહેવું છે કે તેમની પાસે ઇલેક્ટ્રોનિક પુરાવા છે જેમાં તેઓ અને તેમના સાથીઓ સાગરને લાકડીઓથી મારતા જોઇ શકાય છે. સુશીલ કુમારની 23 મેના રોજ મુંડકા વિસ્તારમાંથી ધરપકડ કરવામાં આવી હતી. સુશીલ હાલમાં ન્યાયિક કસ્ટડીમાં છે. દિલ્હી પોલીસની ક્રાઈમ બ્રાન્ચ છત્રસાલ સ્ટેડિયમમાં વિવાદ સાથે જોડાયેલા કેસની તપાસ કરી રહી છે.