રશિયા અને યુક્રેન વચ્ચે સતત 11મા દિવસે યુદ્ધ ચાલી રહ્યું છે. ત્યારે રશિયાને રોકવા માટે અમેરિકા સહિત અનેક મોટા દેશોએ આર્થિક પ્રતિબંધો લગાવીને તેની અર્થવ્યવસ્થાની કમર તોડવાનો પ્રયાસ શરૂ કર્યો છે. આ ક્રમમાં, વિઝા અને માસ્ટરકાર્ડે પણ કડક પગલાં લઈને ત્યાંથી તેમની તમામ સેવાઓ સ્થગિત કરવાનો નિર્ણય લીધો છે. આ કાર્યવાહી હેઠળ, રશિયન બેંકો દ્વારા જારી કરાયેલ માસ્ટર અને વિઝા કાર્ડ હવે દેશની બહાર કામ કરશે નહીં.
વિઝાએ બહાર પાડ્યું નિવેદન
વિઝાએ ગઈકાલે એક મોટું નિવેદન બહાર પાડીને કહ્યું કે અમે રશિયામાં અમારી સેવા તાત્કાલિક અસરથી બંધ કરી રહ્યા છીએ. જો કે, જૂના પેન્ડિંગ કેસ હવે પતાવી દેવામાં આવશે અને ટ્રાન્ઝેક્શન પૂર્ણ થતાં કામ અટકી જશે. રશિયામાં જારી કરાયેલા વિઝા કાર્ડથી શરૂ કરાયેલા તમામ વ્યવહારો હવે દેશની બહાર કામ કરશે નહીં. વધુમાં, વિઝા પ્રમુખ અને સીઈઓ અલ કેલીએ એક નિવેદનમાં જણાવ્યું હતું કે યુક્રેન પર રશિયાના બિનઉશ્કેરણીજનક આક્રમણ અને અસ્વીકાર્ય ઘટનાઓ પછી અમે કાર્યવાહી કરવા માટે મજબૂર છીએ. યુક્રેન પર હુમલાને કારણે વિશ્વભરની અન્ય કેટલીક કંપનીઓએ પણ રશિયા અને તેના લોકો પર નાણાકીય દબાણ વધારવા માટે પગલાં લીધાં છે. આ યુદ્ધ વિશ્વમાં શાંતિ અને સ્થિરતા માટે ચાલી રહેલા અભિયાન માટે ખતરો છે.
માસ્ટરકાર્ડે પણ બહાર પાડ્યું નિવેદન
માસ્ટરકાર્ડે ગઈકાલે જણાવ્યું હતું કે રશિયન બેંકો દ્વારા જારી કરાયેલ કાર્ડ હવે તેના નેટવર્ક દ્વારા કામ કરશે નહીં અને દેશની બહાર જારી કરાયેલ કોઈપણ કાર્ડ રશિયન સ્ટોર્સ અથવા એટીએમ પર કામ કરશે નહીં. માસ્ટરકાર્ડે તેના નિવેદનમાં વધુમાં કહ્યું કે અમે આ નિર્ણયને હળવાશથી લઇ રહ્યા નથી.
