અભિનેત્રી શ્વેતા તિવારીએ પોતાના જીવનમાં ઘણા ઉતાર-ચઢાવ જોયા છે, તેની સાથે જ તેનું અંગત જીવન પણ સંઘર્ષોથી ભરેલું રહ્યું છે. આ બધું હોવા છતાં અભિનેત્રીએ ઈન્ડસ્ટ્રીમાં પોતાનું અલગ સ્થાન હાંસલ કર્યું છે. અભિનેત્રી 2 દાયકાથી વધુ સમયથી અભિનયની દુનિયાનો એક ભાગ છે. હવે સમાચાર છે કે તે જલ્દી જ મોટા પડદા પર પણ ધમાલ મચાવવા જઈ રહી છે.
વાસ્તવમાં, શ્વેતા તિવારીને બોલિવૂડ ઈન્ડસ્ટ્રીના જાણીતા ડિરેક્ટર રોહિત શેટ્ટીના પ્રોડક્શન હેઠળ એક મોટી ફિલ્મની ઓફર કરવામાં આવી છે. આ માહિતી શ્વેતાના બેસ્ટ ફ્રેન્ડ વિકાસ કલંત્રી દ્વારા કરવામાં આવેલી એક પોસ્ટ દ્વારા મળી છે, જેણે અભિનેત્રીને નવી શરૂઆત કરવા બદલ અભિનંદન પાઠવ્યા છે. પોતાની પોસ્ટમાં વિકાસ કલંત્રીએ લખ્યું છે, ‘નવી શરૂઆત…ઓલ ધ બેસ્ટ શ્વેતા તિવારી’. ત્યાર બાદ શ્વેતાએ પણ વિકાસની આ પોસ્ટ પોતાની ઈન્સ્ટાગ્રામ સ્ટોરી પર શેર કરી છે. પોસ્ટ પર રોહિત શેટ્ટીનું નામ પણ લખેલું છે. જાણકારી માટે તમને જણાવી દઈએ કે, શ્વેતા તિવારી છેલ્લે ડિરેક્ટર રોહિત શેટ્ટીના સ્ટંટ બેસ્ટ રિયાલિટી શો ખતરો કે ખિલાડી 11 માં સ્પર્ધક તરીકે જોવા મળી હતી. શ્વેતાએ શોમાં ઘણા ખતરનાક સ્ટંટ કર્યા હતા. આ શો દરમિયાન રોહિત શેટ્ટી અને શ્વેતા તિવારી વચ્ચે સારી બોન્ડિંગ જોવા મળી હતી.
આ વાતમાં કોઈ શંકા નથી કે, શ્વેતા તિવારી વર્ષોથી નાના પડદા પર રાજ કરી રહી છે. તેણે વર્ષ 1999માં પોતાના કારકિર્દીની શરૂઆત કરી હતી. તેણે સુપરહિટ ટીવી શો ‘કસૌટી જિંદગી કી’માં પ્રેરણા શર્મા બજાજનું પાત્ર ભજવ્યું હતું, જે 2001-2008 સુધી ચાલ્યું હતું. પોતાના આ શો દ્વારા શ્વેતાએ દરેક ઘરમાં પોતાની ખાસ ઓળખ બનાવી છે. આ શો બાદ તે ‘પરવરિશ’, ‘બેગુસરાય’ અને ‘મેરે પપ્પા કી દુલ્હન’ સહિતની ટેલિવિઝન સીરીઝની પણ ભાગ બની છે. ટેલિવિઝન સિવાય તેણે ઘણા મ્યુઝિક વીડિયો અને ભોજપુરી ફિલ્મોમાં પણ કામ કર્યું છે. તેમ છતાં આજે પણ એવા ઘણા લોકો છે જે અભિનેત્રીને માત્ર પ્રેરણા તરીકે જ જાણે છે.
