ભારતીય જનતા પાર્ટીના સસ્પેન્ડ કરાયેલા નેતા નુપુર શર્માના વિવાદાસ્પદ નિવેદન સામે અમદાવાદ અને વડોદરામાં દેખાવો કરવામાં આવ્યા હતા. મુસ્લિમ સમુદાયે આ ટિપ્પણીનો વિરોધ કરવા બદલ શર્માની ધરપકડની માંગ કરી હતી. વિરોધને કારણે અમદાવાદના લાલ દરવાજા, મિર્ઝાપુર, દરિયાપુર, તીન દરવાજા વિસ્તારમાં બજારો બંધ જોવા મળી હતી. શહેરના મિર્ઝાપુરમાં જુમ્માની નમાજ બાદ એકઠા થયેલા લોકોએ નૂપુર શર્માની ધરપકડની માંગ કરી હતી. મોટી સંખ્યામાં લોકોએ નારા લગાવ્યા હતા અને રેલી કાઢી હતી.
શહેરના કોટ એક્સટેન્શનના વિવિધ વિસ્તારોમાં શર્માના વિવાદાસ્પદ નિવેદન સામે ઉગ્ર દેખાવો થયા હતા. મિર્ઝાપુરમાં સવારે જુમ્માની નમાજ બાદ લાલદરવાજા વિસ્તારમાં સ્થિત સરદાર બાગ પાસે મોટી સંખ્યામાં લોકો એકઠા થયા હતા. જેમાં મહિલાઓ પણ હાજર હતી. આ લોકોએ વિરોધ કર્યો અને નુપુર શર્માની ધરપકડની માંગ કરી. આ દરમિયાન સુરક્ષા જાળવવા માટે પોલીસે ખાનપુરમાં ભાજપ કાર્યાલય તરફ જતો રસ્તો પણ બંધ કરવો પડ્યો હતો. પોલીસે મુસ્લિમ આગેવાનો સાથે પણ વાતચીત કરી હતી.
આ દરમિયાન પોલીસ દ્વારા આ વિસ્તારમાં ચુસ્ત બંદોબસ્ત ગોઠવવામાં આવ્યો હતો. આ દરમિયાન શાંતિ જાળવવા માટે અનુરોધ પણ કરવામાં આવ્યો હતો. બીજી તરફ વડોદરાના ગોરવા વિસ્તારમાં લોકોએ સૂત્રોચ્ચાર કરીને રોડ પર ચક્કાજામ કર્યો હતો.
નુપુર શર્માના વિવાદાસ્પદ નિવેદનને લઈને દેશના લગભગ 12 રાજ્યોમાં દેખાવો કરવામાં આવ્યા હતા. ઝારખંડમાં આ સમયગાળા દરમિયાન થયેલી હિંસામાં એકનું મોત થયું હતું. ઘણી જગ્યાએ બજારો પણ બંધ રાખવામાં આવી હતી.
